ЭРКИН ИҚТИСОДИЙ ЗОНА – КЕНГ ИМКОНИЯТЛАР МАЙДОНИ

“Ургут” эркин иқтисодий зонасида умумий қиймати 196,2 миллион АҚШ доллари қийматидаги 60 та лойиҳа амалга оширилиши режалаштирилмоқда. Мазкур лойиҳалар ишга тушиши натижасида 4185 та янги иш ўринлари яратилиши, 258,23 миллион АҚШ доллари қийматидаги маҳсулот ишлаб чиқарилиши ва 108 миллион АҚШ доллари миқдоридаги маҳсулот экспорт қилиниши кўзда тутилган.

Айни пайтда “Ургут” ЭИЗ иштирокчилари томонидан лойиҳалар бўйича қурилиш ишлари жадал олиб борилмоқда. Жумладан, Ш.Мирбобоев раҳбарлик қилаётган “URGUT MIKRO METALL” МЧЖ томонидан “Сариқтепа” массивида 2 миллион АКШ доллари миқдоридаги “Полимер ва пластмасса маҳсулотлари, бир марталик соқол олгичлар, тиш тозалаш шчёткалари ва нам салфеткалар ишлаб чиқариш” лойиҳасини амалга ошириш мақсадида қурилиш ишлари амалга ошириляпти. Ишлаб чиқариш дастгоҳлари етказиш бўйича чет эллик ҳамкорлар билан шартномалар имзоланди. Мустақиллик байрами арафасида корхона тўлиқ ишга тушиши кутилмоқда.

Худди шундай, Ф.Мажидов раҳбарлик қилаётган “SAM ELEKTRO SERVIS” МЧЖ томонидан 4,1 миллион АҚШ доллари миқдоридаги “Газ плиталари ва электр духовкалар ишлаб чиқариш” лойиҳасини амалга ошириш бўйича бир қатор ишлар амалга оширилди. Хусусан, ишлаб чиқариш цех биноси қад кўтарди. Технологик асбоб-ускуналар етказишга буюртмалар берилган бўлиб, мазкур корхона ҳам истиқлол шодиёналари арафасида тўлиқ ишга тушиши режалаштирилган.

Эркин иқтисодий зонанинг барча ҳудудларида муҳандислик-коммуникация инфратузилмаси яратилиши бўйича чора-тадбирлар белгиланган. Жумладан, 42 километр автомобил йўлларини капитал таъмирлаш, 17,5 километр электр тармоғи тортилиши ва янги 4 та кичик станциялар қурилиши, 65,5 километр табиий газ таъминоти, ичимлик суви ва оқова (канализация) соҳасида 4 та сув иншооти ҳамда 24,5 километр канализация тармоқлари қурилиши, телекоммуникация соҳасида 37 километр алоқа линиялари тортиш ва базавий станциялар ўрнатилиши режалаштирилган.

“Сариқтепа” массивида бош режага асосан 7 километр ички йўллар барпо этилиб, шағал қопламаси ётқизилди. 

“Мерганча” массивида қўшимча равишда 25000 кВА электр кичик станцияси олиб келиниб, қурилиш-монтаж ишлари олиб борилмоқда. 

“Сариқтепа” массивидаги лойиҳаларнинг узлуксиз электр таъминоти учун “Суғдиёна” кичик станциясидан 2,8 километр 10 кВа электр тармоғи тортилиб,”URGUT MIK-RO METALL” МЧЖ, “SAM ELEKTRO LYUKS” МЧЖ, “IDEAL LAZER TEKS” МЧЖ, “REAL SPORT SHOES” МЧЖ каби корхоналар олдигача электр тармоқлари тортиб берилди. 

“Мерганча” ва “Сариқтепа” массивларига 9,5 километр газ тармоқлари тортиш ва 3 та саноат тугунлари ўрнатиш ишлари якунига етказилмоқда

“Ургут” эркин иқтисодий зонасида маҳаллий ва хорижий инвесторларга кўмаклашиш учун барча куч ва имкониятлар сафарбар этилган. Мазкур ҳудуд кун сайин тадбиркорлар учун кенг имкониятлар майдонига айланиб боряпти.
Нусрат БОБОЕВ

2015-2024 © Ургут туман ҳокимлиги. Сайт яратувчиси: SAKTRM
95x15