Жисмоний шахслар якка тартибдаги тадбиркор сифатида таксичилик қилганда қанча солиқ тўлайди?

— Жисмоний шахслар якка тартибдаги тадбиркор сифатида таксичилик қилганда қанча солиқ тўлайди?

— “Автомобиль транспортида йўловчилар ташиш фаолиятини тартибга солишни янада соддалаштириш чора-тадбирлари тўғрисида”ги Президент Қарорига мувофиқ, йўловчиларни ҳайдовчидан ташқари тўрттадан ортиқ бўлмаган ўриндиқларга эга бўлган енгил автотранспорт воситаларида ташиш фаолияти билан якка тартибдаги тадбиркор(ЯТТ)лар шуғулланиши мумкин бўлган фаолият турлари рўйхатига киритилган.

ЯТТлар томонидан йўловчиларни енгил автотранспорт воситаларида ташиш фаолияти лицензия варақасига асосан амалга оширилади. Лицензия варақаси 21 ёшга тўлган ва бошқарувида аризани бериш вақтида 10 йилдан ортиқ бўлмаган вақт давомида эксплуатация қилинаётган автомобиль транспорти мавжуд бўлган якка тартибдаги тадбиркорларга “Лицензия” ахборот тизими орқали берилади.

Бунда йўловчиларни енгил автотранспорт воситаларида ташиш фаолияти билан шуғулланувчи ЯТТлар 2021 йилда ойига 150 минг сўм солиқ тўлайди. Шунингдек, лицензия варақаси учун йилига 245 минг сўм давлат божи ундирилади.

Бундан ташқари, 2021 йил 1 сентябргача бўлган даврда ЯТТларни давлат рўйхатидан ўтказганлик учун давлат божи ундирилмайди.

_____________

— Jismoniy shaxslar yakka tartibdagi tadbirkor sifatida taksichilik qilganda qancha soliq toʻlaydi?

— “Avtomobil transportida yoʻlovchilar tashish faoliyatini tartibga solishni yanada soddalashtirish chora-tadbirlari toʻgʻrisida”gi Prezident Qaroriga muvofiq, yoʻlovchilarni haydovchidan tashqari toʻrttadan ortiq boʻlmagan oʻrindiqlarga ega boʻlgan yengil avtotransport vositalarida tashish faoliyati bilan yakka tartibdagi tadbirkor(YATT)lar shugʻullanishi mumkin boʻlgan faoliyat turlari roʻyxatiga kiritilgan.

YATTlar tomonidan yoʻlovchilarni yengil avtotransport vositalarida tashish faoliyati litsenziya varaqasiga asosan amalga oshiriladi. Litsenziya varaqasi 21 yoshga toʻlgan va boshqaruvida arizani berish vaqtida 10 yildan ortiq boʻlmagan vaqt davomida ekspluatatsiya qilinayotgan avtomobil transporti mavjud boʻlgan yakka tartibdagi tadbirkorlarga “Litsenziya” axborot tizimi orqali beriladi.

Bunda yoʻlovchilarni yengil avtotransport vositalarida tashish faoliyati bilan shugʻullanuvchi YATTlar 2021-yilda oyiga 150 ming soʻm soliq toʻlaydi. Shuningdek, litsenziya varaqasi uchun yiliga 245 ming soʻm davlat boji undiriladi.

Bundan tashqari, 2021-yil 1-sentyabrgacha boʻlgan davrda YATTlarni davlat roʻyxatidan oʻtkazganlik uchun davlat boji undirilmaydi.