ОФАРИН, РУҚИЯ!

Спортни ривожлантиришга қаратилаётган эътибор туфайли ёш шахматчи ўсмирларимиз Осиё, жаҳон биринчиликларида катта ютуқларни қўлга киритмоқда. 
Беларусь пойтахти Минск шаҳрида шахматнинг блиц ва рапид йўналиши бўйича ўсмирлар ўртасида II Жаҳон чемпионати бўлиб ўтди.
Ғолиблар орасида Ўзбекистон ўсмирлар терма жамоаси аъзоси, Қуйи Тегана маҳалласида жойлашган 81-умумтаълим мактабининг 2-синф ўқувчиси Руқия Олимова ҳам борлиги ургутликлар қалбини фахр-ифтихорга тўлдирди.
Минск шаҳрида ўтказилган Жаҳон чемпионатида дунёнинг 26 та давлатидан келган ўсмир-қиз ва йигитлар ғолиблик учун кураш олиб бордилар.
Ўзбекистонлик ёш шахматчилар рапид йўналишидаги баҳсларда иккита олтин, иккита кумуш, блиц беллашувлариларида эса учта олтин ҳамда иккита кумуш медалларини қўлга киритишди.
Ургутнинг мўъжазгина қишлоғида туғилиб вояга етган 8 ёшли Руқия Олимова чемпионатда аъло даражада қатнашиб, кумуш медалга сазовор бўлди.
Умумжамоа ҳисобида ҳамюртларимиз биринчи ўринни эгаллаб, жаҳон чемпиони бўлишди. Улар сафида Руқиянинг ҳам борлиги қалбларимизга битмас қувонч бағишлайди.
Иккинчи ўринни россиялик шахматчилар эгаллаган бўлса, украиналик спортчилар учинчи ўринни қўлга киритишди.
Жаҳон чемпионатидан кейин бироз ҳордиқ чиқарган Руқия Шри-Ланкада ўсмирлар ўртасида ўтказилган Осиё чемпионатида қатнашиб, аъло натижаларни қўлга киритди. Рапид йўналишида биринчи ўринни эгаллаб, олтин медаль ва Осиё чемпиони номига сазовор бўлган бўлса, стандарт йўналишида кумуш медални қўлга киритди.
Тошкент халқаро аэропортида ҳар икки мусобақалардан сўнг ёш шахматчиларимиз тантанали кутиб олинди. Мухлислар Руқияни ҳам гулларга буркаб ташлашди.
Кўксини жаҳон чемпионатининг, Осиё биринчилигининг олтин ва кумуш медаллари безаб турган қизимизга офарин, тасанно, деймиз!
Руқия Олимованинг қўлга киритган жаҳоншумул муваффақиятлари муносиб тақдирлашга лойиқдир.
Жасур МАМАДАМИНОВ